Íoslódáil

• Má úsáideann tú pacáiste TeX ar nós TeX Live, is dócha go bhfuil na rialacha fleiscínithe don Ghaeilge agat cheana féin, agus ní gá duit aon rud a íoslódáil ná a shuiteáil ón suíomh seo. Ar an gcóras Linux atá agamsa (bunaithe ar Debian), ba leor an pacáiste texlive-base a shuiteáil.
• Má tá tú ag iarraidh na rialacha féin a íoslódáil ar chúis éigin, tá an comhad hyph-ga.tex ar fáil ó CTAN, nó is féidir leat an leagan is déanaí a fháil ónár suíomh GitHub.
• Úsáideann leaganacha níos sine de TeX agus ríomhchláir eile ar nós GNU Troff comhad ASCII-amháin ina bhfuil na rialacha darb ainm gahyph.tex. Tá an comhad seo ar fáil ó CTAN freisin, nó ón suíomh GitHub.
• Is féidir na rialacha a úsáid in OpenOffice.org trí bhreiseán a shuiteáil.
• Tá an breiseán céanna ar fáil le haghaidh LibreOffice anseo.
• Tá an comhad hyph_ga_IE.zip (le haghaidh Scribus, nó LibreOffice/OpenOffice.org mura bhfuil tú ag iarraidh na breiseáin thuas a shuiteáil) ar fáil ó fhreastalaí de chuid OpenOffice.org nó ón suíomh GitHub.
• Tá an comhad ga.xml le haghaidh Apache FOP nó Folio ar fáil ar GitHub freisin.
• Is cuid den chód foinseach sa bpacáiste Hyphenator.js na rialacha anois. Tá tuilleadh eolais ar fáil sa doiciméadú.

---

Úsáid LaTeX

Chun cáipéis i nGaeilge a chur i gcló in LaTeX, ní gá duit ach na línte seo a chur sa mbrollach:

\usepackage[irish]{babel}
\usepackage[utf8]{inputenc}
\usepackage[T1]{fontenc}

ansin an cháipéis a thiomsú le LaTeX mar is gnáth. Socraíonn seo Gaeilge mar phríomhtheanga na cáipéis. Más gá duit sliocht i mBéarla a chur san áireamh, athraigh an líne “babel” go:

\usepackage[english,irish]{babel}

agus bain úsáid as \selectlanguage mar a leanas:

\begin{document}
Tá sé thar a bheith éasca fleiscíní
a chur san áireamh anois.

\selectlanguage{english}
We don't talk no foreign talk
round these here parts.

\selectlanguage{irish}
Bainfidh mé úsáid as an acmhainn iontach seo.
\end{document}

---

Nótaí Tábhachtacha

• Cuireann TeX briseadh roghnach i bhfocal tar éis aon fhleiscín atá ann, sa chaoi go mbristear focail ar nós Breac-Ghaeltacht nó Ard-Aighne ag an bhfleiscín.
• Faraor, níl an riail seo feiliúnach i gcás réimíreanna, mar shampla t-idirnáisiúnachas nó n-uibheacha. Ní mór duit fleiscíní roghnacha de do chuid féin a chur isteach más gá focal den sórt seo a bhriseadh: t-idir\-náisiún\-achas.
• Ar an lámh eile, uaireanta is gá cosc a chur ar bhriseadh tar éis “t-” nó “n-”; chun é seo a dhéanamh, caithfidh tú an focal a chur isteach i gclib \mbox.
• Tá an scéal mar an gcéanna i gcás focal ina bhfuil uaschamóg.
• Toisc go gceadaítear amh-ras mar fhleiscíniú, creideann TeX gur féidir an focal drochamhras a bhriseadh san áit chéanna (drochamh-ras), cé go mbeadh an briseadh droch-amhras i bhfad níos fearr. Faraor, ní féidir “meáchain” a cheangal le pointí fleiscínithe éagsúla in TeX, agus dá bharr sin caithfidh tú a bheith san airdeall ar dhrochshamplaí den sórt seo.
• Gheobhaidh tú liosta de na fabhtanna ar m'eolas ag deireadh an leathanaigh Mionsonraí page.