Shenn Ven Veg
Va skeeal goll mygeayrt ayns Purt ny hInshey laa dy row mychione shenn ven
veg va goll mygeayrt faggys da'n traie, as va mish baghey er bayr ry
traie ec y traa shen ayns thie mooar ta enmyssit nish yn Raglan, as va mee baghey
marish my nauntyn roish my row mee poost, as ren shoh taghyrt mysh,
foddee, daeed blein er dy henney nish.
Agh aghterbee, va goaldee sy thie
ayns y tourey as keayrt dy row dooyrt ny goaldee, ny joarreeyn rish my nauntyn,
“Quoi yn chenn ven ta cheet gys y dorrys nish as reesht?”
As dooyrt my nauntyn roo, “Cre'n torch dy ven ta shen?”
As ta cooinaghtyn aym er fer ny goaldee, as dooyrt eh, “Va mee ayns y
halley riyr as cha row sheean erbee voish y chlag agh honnick mee
fer ennagh ny hassoo er y ghreeish cheumooie yn thie, as doshil mee
yn dorrys as va shenn ven veg as eaddagh doo urree ny shassoo er y
ghreeish as dooyrt mee ree, “Quoi... vel shiu geearree dy loayrt
rish ben y thie?” as doaltattym va'n chenn ven ersooyl, kiart myr shen —
un shallid v'ee aynshen, as shallid ny lurg shen v'ee ersooyl;” as
ren shoh taghyrt tree ny kiare keayrtyn ec y thie ain hene, as ta sleih
elley er vakin ec y traa shen y lheid cheddin er raad ny traie hene as
er straidyn elley mygeayrt-y-mysh.