Cur er Peiagh dty Olt y Ghiarrey
Ta ymmodee skeealyn veih Petworth as yn cheayrt shoh inshyms diu fer
jeu dinsh enmyssit John Williams dou. Cha nel John er jeet gys yn Ellan
agh un cheayrt, agh ta mee shickyr dy vaikym eh ayns shoh traa ennagh
dy gerrid, er yn oyr dy vel my huyr er n'insh dou dy vel eh aggindagh
dy heet reesht. Tra haink eh gys shoh yn chied cheayrt, va e ayr
er ngeddin baase tammylt beg roish shen. Va my ayr as Joe Williams, jishig
John, nyn gaarjyn mie, as ta my ayr er n'insh dou palchey mychione Joe,
agh shen skeeal elley.
Va dooinney aeg gobbragh ayns Petworth as laa dy row
v'eh geearree goll gys y vaareyder as eshyn e olt y ghiarrey. Ren eh
scuirr voish e obbyr as hie eh roish. Tra haink eh er ash va e ailleyder
fuirraghtyn rish as dooyrt eh.
“Cre'n boayl v'ou? Va mee shirrey ort.”
“Va mee marish y vaareyder as va'n folt aym giarrit,” dreggyr eh.
“Cre'n oyr hie oo gys shen ayns y traa-obbree?” dooyrt yn fer elley.
“Nagh vel my olt gaase ayns y traa-obbree?”
“Cha nel ooilley jeh.”
“Agh cha row ooilley my olt giarrit voym,” dooyrt yn dooinney aeg.