Peeikear sy Thie
Dinsh Illiam y Kennaugh dou bleeantyn er dy henney dy jagh eh un oie dy chur
shilley er Thom, as yeear eh er dy ghiarey folt e ching myr v'eh
cliaghtit dy yannoo. Cha row Thom jannoo veg ec y traa shen, as myr
v'eh dy kinjagh shirrey beggan dy argid, hoie eh Illiam er stoyl rish
y chiollagh. Hug eh brelleein mygeayrt e wannal as ghow eh toshiaght dy ghiarey
folt Illiam.
Loayr y ghaa ghooinney ry cheilley rish tammylt,
as Thom gobbraghey er y jouishan, tra honnick Illiam roddan fo'n chlag
liauyr.
“Hom, Hom,” phisheyree Illiam, “ta roddan peeikearagh orrin.”
“Oh, vel eh dy jarroo?” dreggyr Thom jeeaghyn er dorraghys ny corneil. “Cha
vaikyms veg erbee.”
“Fo'n chlag, whooinney,” phisheyree Illiam reesht, “t'eh jannoo eh foast.”
“Cha jean eh y lheid shen arragh rish tammylt foddey,” dooyrt Thom,
as hayrn eh magh e laue da'n ghunney echey v'er y skelloo. Va polt
atchimagh ayn as veg ry akin agh jaagh ghoo. Lheim Illiam veih'n stoyl
echey myr mwaagh as roie eh roish thie gys beeal ny bayryn as y roddan
er e hoshiaght.
Ec y cheayrt shen va shenn Harry y Condra dooney giat
y vayr echey ec Close y Kee, as honnick eh scaan bane getlagh seose y
vayr ayns y dorraghys. Smooinee eh dy jirree eh voish y rhullick as
v'eh bunnys ass e cheeaill tra raink eh gys e hie.
Dobbree yn chlag
v'ec Thom gyn scuirr rish ymmodee bleeantyn, ga dy row towl mooar ayn,
as vaikagh fer ny trimmidyn ec kione ny shiaghtyn. Cha dug Illiam kied
da Thom dy ghiarey e olt arragh, as va shen yn traa s'jerree dy ghoon
Harry y Condra y ghiat echey ayns y dorraghys.