“Jarrood y Theihll, Jarroodit ec y Theihll”
Ta mee er chlashtyn skeeal mychione dooinney aeg ennagh va shooyl laa dy row
'sy tourey harrish ny sleityn ayns mean ny h-ellan, tra haghyr eh
er shenn dooinney shooyl dy-moal trooid y freoagh, maidjey ny-laue, as
shenn voddey marish, as hass ad rish tammylt taggloo ry-cheilley.
Dooyrt yn shenn dooinney dy row eh er vaghey 'syn un voayl, thie-thooit cha nee
foddey jeh, ooilley e ennal bunnys. V'eh boght dy-jarroo, agh b'gummey
leshyn shen; v'eh cliaghtit rish boghtynid.
Va meer dy halloo echey myr
garey cour praaseyn, cabbashyn, as ooilley myr shen; va shioltane veg
dy chirree echey er y clieau, shiartanse dy chiarkyn roie mygeayrt y
thie, as chibbyr vie nagh row rieau chirrym. Cha row eh rieau poost,
as v'eh er vaghey ny lomarcan rieau er dyn baase e ayrey mysh daeed
vlein er-dy-henney. Agh v'eh jannoo dy-mie, as booiagh dy-liooar.
Ghow yn dooinney aeg yindys dooinney erbee y gheddyn ayns lheid y voayl
shen. Yeeagh eh mygeayrt-y-mysh er ny rheeastyn follym as yn speyr lhean
as gorrym, as dooyrt eh “S'aalin y voayl shoh dy-jarroo — 'sy tourey
er y chooid sloo! Agh nagh nee fadaneagh dhyt eh, baghey ayns shoh dty lomarcan
blein lurg blein? Row uss baghey ayns shoh trooid-magh y caggey
mooar?”
Hyndaa yn shenn dooinney e chione, as dooyrt eh, “Caggey? Cre'n
caggey shen?”