Dooinney Va Ceau “Oilskins”
Cheayll mee yn skeeal shoh voish George Clementson as v'eh ginsh
mychione yn chenn chashtal ec Purt ny hInshey, as va tushtey mie ec
George mychione y chashtal as v'eh er nyannoo studeyrys dowin ayns
reddyn bentyn rishyn. As v'eh dy mennick ayns y chashtal er lheh ayns y
tourey. Aghterbee, laa dy row v'eh shooyll mygeayrt y chashtal as jeeaghyn
aynshoh as aynshen, as haink eh mygeayrt yn chenn cheeill, Keeill Pherick,
as haink eh stiagh er y thalloo hene, as myr v'eh cheet er y faaie va
lesh y cheeill vooar (Ardchiamble Noo Charmane) honnick eh dooinney ny
hoie er clagh aynshoh faggys da'n cheeill vooar. Agh hoshiaght cha ghow
George monney tastey jeh, son va ymmodee dy leih goll mygeayrt y chashtal
ayns y tourey, as tra haink eh ny sniessey da'n dooinney shoh, honnick
eh dy row eh ceau slane eaddagh dy... cha nel fys aym er yn ockle sy
Ghaelg — oilskins, voish kione gy cass as sou'wester er y chione echey,
as va ushtey roie sheese voish y eaddagh ayns y strooanyn. As dooyrt
George dy row yn ghrian soilshean as va lane soilshey er y ghrian, as
v'eh cheh as chirrym as laa mie ayns y tourey. As ny yeih va'n dooinney
ny hoie er y chlagh shoh as ooilley'n ushtey roie ersooyl voish e eaddagh
ayns strooanyn. Va George er-aggle as ren eh chyndaa mygeayrt as hie eh
dys yn ghiat y raad elley mygeayrt ny boayllyn elley. Agh cha dod George
toiggal cre sy teihll va goll er as ry akin, agh shen yn skeeal dooyrt
eh rhyms. Ta cooinaghtyn mie aym er y laa shen, as cha row eh ayns y
chashtal ny lurg shen rish tammylt, ta mee shickyr.