Eeasteyr Elley dy Gheiney
Ta mee er n'insh diu dy row Ean Curphy mie dy gheddyn lobbaghyn agh
v'eh ny eeasteyr mie neesht. Va shin ooilley ceau nyn rimlee fo laue
tra hooar Ean aght noa. V'eh ceau e rimlagh erskyn e chione. Hie yn
rimlagh tammylt sodjey voishyn er yn aght shoh, as va shin ooilley
feer hrooagh rish. Shimmey keayrt va mee geabbey dy yannoo shoh as
va mee shickyr dy row eh cheet lhiam as dy row mee cheet dy ve
feer aghtal.
Fastyr dy row va mee geeastagh er y chey marish my ayr. Va mee
slane dy voyrn jeem pene dy yeeaghyn da yn aght noa. Tra cheau mee yn
rimlagh yn chied cheayrt ghleash my ayr tammylt beg voym. Dooyrt eh dy row
rouyr dy ghooanyn getlagh mygeayrt e chleayshyn. Tammylt beg ny s'anmey
hayr mee daa voadagh. By haittin lhiam shen as myr shen daase mee
ny s'daaney. Yn cheayrt sniessey hilg mee yn rimlagh; cheau mee eh lesh
ooilley my niart. Veagh eh er ngoll dy slane magh ass shilley er-lhiam
mannagh row unnane jeh ny dooanyn tayrit er my ordaag.
Dooyrt my ayr,
“Cre ta goll er? Vel oo tayrit er y chey?”
“Cha nel,” dreggyr mish, “Hayr mee mee hene.”
Yeeagh mee my ordaag da
as yn dooan mooar aynjee. Dobbyr da tuittym neealloo agh ren eh e chooid share
dy hayrn yn dooan magh. Cha dod eh veg y yannoo as fy yerrey hooyll
shin gys yn fer-lhee. Dooyrt my ayr, “Shen y tayrtyn smoo vees ayd dy bragh.
Daa voadagh as oo hene!”