Cabbyl-Ushtey ec Glion Meay
Cheayll mee bleeantyn er dy henney nish
skeeal mychione dooinney va baghey ec y traa shen ec Glion Meay — ta
shiu er chlashtyn mychione y Chabbyl-Ushtey, na' vel? — t'ad gra dy row
cabbyl-ushtey baghey ec yn eas vooar ec Glion Meay, as ta shiartanse dy
skeealyn goll mygeayrt mychione y chretoor shen.
Aghterbee, ayns y
chaggey, yn caggey shoh chaie, va camp ec Glion Meay, as va earroo dy leih
baghey aynshen v'ayns yn armailt aeragh as va skeeal goll mychione
un dooinney va ayns yn armailt aeragh as v'eshyn goaill aaght ayns nane
jeh ny thieyn ec Gortyn jeeragh ec yn chenn chabbal ta aynshoh. As oie dy row
hie eh magh — as v'eh son goll dys y traie, sheese y glion, as
v'eh ersooyl voish y thie feer foddey — cha daink eh dy valley derrey
mean-oie bunnys, as v'eh ayns stayd treih dy liooar. Cha row eh son
loayrt as v'eh ooilley er-creau myr dy beagh eh feer ching. Aghterbee,
dooyrt eh dy row eh er ngoll sheese y glion dys y traie, as v'eh cheet
er ash as haink eh dys kione ny glionney faggys da'n eas vooar as ny lurg shen
cha vod eh cooinaghtyn er red erbee, agh v'eh taggloo mychione
‘y cabbyl, y cabbyl,’ as shen ooilley oddagh eh gra.
Aghterbee, v'eh
er ve ching as v'eh currit ersooyl dys Sostyn, as cha ren ad clashtyn
veg ny sodjey my-e-chione. Agh haink red ennagh ersyn yn oie shen,
aghterbee. V'eh ny ghooinney aeg ayns slaynt mie as follan as v'eh kiart
dy mie, as haink red ennagh er as ooilley v'ad clashtyn jeh va ‘y cabbyl,
y cabbyl,’ as shen ooilley v'eh son gra.