Boayl Feayr da Tarr
Ta'n skeeal shoh mychione dooinney enmyssit Jamys. Va croit veg echey
as kirree, ollagh as kiarkyn ry akin mygeayrt e hie. Agh va'n cheird
echey myr seyir, as v'eh feer schleioil jannoo cairtyn, queeylyn as y
lheid da ny eirinee.
Aghterbee, va peiagh ayn shirrey tarr dy hlaa er
mullagh y thie veg echey, er yn oyr dy row eh jeant ass yiarn as v'eh
mergagh as gaase tanney. Cheayll eh dy row beggan dy harr ec Jamys as
hie eh roish un astyr souree dy chur shilley er.
“Ta tarr aym kiart dy liooar,” Dooyrt Jamys, jeeaghyn mygeayrt-y-mysh,
“agh ta egin dhyts cheet er ash
ny s'anmey tra ta dorraghys ayn.”
Hie yn dooinney thie reesht,
smooinaghtyn dy row Jamys ro harroogh dy ghoaill tastey jeh, as duirree
eh ayns shen derrey v'eh dorraghey. Yn nah cheayrt hie eh gys thie Yamys
cha row veg ry akin agh soilshey ayns yn uinnag as myr shen chrank eh
er yn dorrys. Doshil Jamys eh as dooyrt eh, “Quoi t'ayn?”
“She mish t'ayn, yn fer ta shirrey y tarr.”
“Vel fer erbee mayrts?”
“Cha nel.”
“Trooid stiagh rish tammylt.”
Ghow Jamys neose shenn londeyr voish treiney
va sy woalley as doad eh eh lesh speeineig voish yn aile. Eisht ghow eh
kiebbey sy laue as hooyll eh magh ass y thie as eh-hene geiyrt er. Hooyll
ad sheese gys kione heese y gharey-ooyl faggys da'n vayr vooar, as cha row
sheean erbee ry chlashtyn.
“Shoh yn ynnyd,” ren Jamys pisheyragh, as vrod eh y thalloo lesh
y chiebbey.
Ren eh chee ny foadyn, hrog eh ad as hug eh ad dy kiarail
ec yn un cheu. Eisht reuyr eh magh yn ooir derrey va mullagh mollag ry akin
ayns soilshey y londeyr.
“Cre'n oyr ta shiu freayll tarr ayns y voayl shoh, Yamys?
Cha nel eh feer aashagh dy roshtyn eh.”
“Well,” dreggyr Jamys, “T'eh dy reayll eh voish soilshey ny greiney.”
Agh tra hrog Jamys neese farkyl ny mollag va ny focklyn ‘IOM Highway Board’
ry akin losht ayns y fuygh!